හදවතේ සිහිනය – බටවල කනිෂ්ඨ විද්‍යාලය

පරිගණකයක් ලබාදීමෙන් ඇරඹුණු තවත් සිහිනයක්

දිනය: 2020 ඔක්තෝබර් 01
පාසල: බටවල කනිෂ්ඨ විද්‍යාලය
දිස්ත්‍රික්කය: කොළඹ
ව්‍යාපෘතිය: හදවතේ සිහිනය – පරිගණක ව්‍යාපෘතිය
සංවිධානය: ඉසුර වික්‍රමාරච්චි පදනම

“හදවතේ සිහිනය” ව්‍යාපෘතිය යටතේ පරිගණක පහසුකම් නොමැති හා අඩු පහසුකම් සහිත පාසල් සඳහා පරිගණක ලබාදීමේ වැඩසටහනේ තවත් පියවරක් ලෙස, 2020 ඔක්තෝබර් 01 දින කොළඹ දිස්ත්‍රික්කයේ බටවල කනිෂ්ඨ විද්‍යාලයට පරිගණකයක් ලබාදීමට මට අවස්ථාව ලැබුණා.

නමුත් එදින මට මතකයේ රැඳුණේ පරිගණකය ලබාදුන් අවස්ථාව පමණක් නොවෙයි. පාසලේ සිටි විශේෂ අවශ්‍යතා සහිත දරුවන්ගේ පන්ති කාමරය දැකගැනීමට ලැබීම, පසුව මගේ තවත් සමාජ සේවා ව්‍යාපෘතියකට මූලාරම්භය වූ ඉතා වැදගත් මොහොතක් බවට පත්වුණා.

එම පන්ති කාමරයේ පහසුකම් ඉතා සීමිත බව දැකගන්න ලැබුණා. දරුවන්ගේ දෙමාපියන් සමඟ කතා කළ විට, විශේෂයෙන්ම දරුවන් වැසිකිළිය භාවිත කිරීමේදී මුහුණ දෙන අපහසුතා පිළිබඳව ඔවුන් හැඬූ කඳුළින් මට පැහැදිලි කළා. එය මට දැඩි ලෙස දැනුණු කාරණයක් වුණා.

එදිනම මගේ සිතේ තවත් අධිෂ්ඨානයක් ඇතිවුණා — මේ විශේෂ අවශ්‍යතා සහිත දරුවන්ගේ පන්ති කාමරයටම සම්බන්ධ වූ, ඔවුන්ගේ අවශ්‍යතාවලට ගැළපෙන වැසිකිළි හා නානකාමර පහසුකමක් ඉදිකර දිය යුතුයි කියන අදහස.

එදින දරුවන්ගෙන් සමුගත් පසු මම Facebook හි තැබූ සටහනේද ඒ හැඟීම සටහන් කළා:

“විශේෂ අවශ්‍යතා සහිත දරුවන්ගේ පන්ති කාමරයේ අඩුපාඩු බොහොමයි. මට හැකි අයුරින් ඒ වෙනුවෙන් යමක් කිරීමේ අධිෂ්ඨානය ඇතිව පුංචි පැටව්න්ට සමුදුන්නා. අනිවාර්යයෙන්ම ඒ පන්ති කාමරය වෙනුවෙන් යමක් කිරීමට මට හැකිවේවි. ආදරණීය දරුවෝ.”

ඒ නිසා බටවල කනිෂ්ඨ විද්‍යාලයට ගිය මේ ගමන මගේ සමාජ සේවා කටයුතුවල වැදගත් සන්ධිස්ථානයක්. එදින මම පාසලට ගියේ පරිගණකයක් ලබාදීමටයි. නමුත් ආපසු පැමිණියේ ඒ දරුවන් වෙනුවෙන් තවත් දෙයක් කළ යුතුයි කියන අලුත් සිහිනයක් හදවතේ තබාගෙනයි.

https://isurawickramarachchi.comproject/202/sanitary-facility-for-children-with-special-needs